मोरङको कानेपोखरीमा भयानक दुर्घटना, ५ जनाको मृत्यु २४ घाइते

पूर्व-पश्चिम राजमार्ग अन्तर्गत मोरङको कानेपोखरीमा बस दुर्घटना हुँदा ४ जनाको घटनास्थलमै मृत्यु भएको छ। अन्य २४ जना घाइते भएका छन्। बुधबार साँझ सात बजेर १५ मिनेटमा कानेपोखरीको छधारे भन्ने ठाउँमा  काकडभिट्टाबाट बुटवल जाँदै गरेको ना ५ ख ५३८७ नम्बरको बस र मे ४ प ८५११ मोटरसाइकल ठोक्किदा दुर्घटना भएको इलाका प्रहरी कार्यालय पथरीले जनाएको छ। मृत्यु हुनेहरुमा मोटरसाइकलमा सवार अन्दाजी १८-२० बर्षका लेटाङ-३ का तिलक लिम्बु र देवेन्द्र लिम्बु तथा बसमा रहेका झापाका पुरुषोत्तम सुवेदी (बसको टिकटको आधारमा पहिचान गरिएको) छन्। बाँकी एक महिला यात्रुको पहिचान हुन सकेको छैन। घाइतेमध्ये केरौनका शंकर विक गम्भीर घाइते छन्। उनलाई विराटनगरस्थित न्यूरो अस्पताल लगिएको छ। चार जना घाइतेलाई शिलगुढी लगिएको प्रहरीले जनाएको छ। पथरीस्थित इलाका प्रहरी कार्यालयका प्रहरी निरीक्षक राजन कार्कीका अनुसार काकरभिट्टाबाट बुटवलतर्फ जाँदै गरेको बस मोटरसाइकलमा ठक्कर खाएपछि अनियन्त्रित भएर दुर्घटनामा परेको हो। अनियन्त्रित बस रुखमा ठोक्किएर क्षतविक्षत भएको छ। घाइते  हुनेमा इलाम सूर्योदयकी बबिता विक, झापाका रोशन मण्डल, सतन इम्बु, सुनिता टुडु, सतुवा हैमरन, गौरीगञ्ज झापाका सन्तोष माझी, किशोर चौधरी, लिलबहादुर भट्टराई, मनिस भट्टराई, भद्रपुर झापाका अनिस विक, गौरीगञ्ज झापाकै दिलिप मण्डल, घैलाडुब्बा झापाका करनजित वर्मा, सिक्किम भारतकी मित्रावती भट्टराई, नारायण प्रसाद भट्टराई, बुटवलका राज आले, केरौन मोरङका विजय मुर्मु, पोखराका अनिल राना मगर, उत्तर प्रदेश भारतका ईश्वर अली र पथरी मोरङका रामकुमार राई रहेका छन्। उनीहरूको बसमा काटेको टिकटका आधारमा पहिचान गरिएको हो। बसमा २८ जना यात्रु सवार थिए। ४ जना शिलगुढी ४ जना बिराटनगर र  बाँकी घाइतेको पथरी अस्पतालमा उपचार भइरहेको छ। यस्तै सोही ठाउँमा अहिले केही बेर अघि अर्को दुर्घटना हुँदा १ जनाको ज्यान गएको छ। राति ९ बजेर ४० मिनेटमा बा ४० प १२९ नम्बरको मोटरसाइकललाई तरकारी लिएर आएको पिकअप भ्यानले ठक्कर दिँदा दुर्घटना भएको हो। मोटरसाइकलको पछाडि बस्ने अर्का एक जना गम्भीर घाइते भएका छन्। उनको विराटनगर न्यूरो अस्पतालमा उपचार भइरहेको छ। पाँचै जनाको शव पोष्टमार्टमका लागि मंगलबार अस्पतालमा राखिएको छ। -